منوعات وفنون

بعد تصنيفه ناقد هدام.. (دندش) يمجد “ميادة قمر الدين”

متابعات : سودان لايف نيوز

مامعنى اننا انتقدنا فنان او فنانة قبل كدا مانكتب عنو حاجة سمحة لما يتطور ويعالج سلبياتو…النقد اساساً الهدف منو تطوير الفنان ولفت نظرو للسلبيات الممكن تهدد مسيرتو الفنية.

يلا من بنفس المنطق دا الليلة انا حابب اتكلم عن الفنانة ميادة قمر الدين…واحدة من الفنانات الوجهت ليهن نقد كتير… بس عمرها مااتضجرت او اتضايقت من النقد، بالعكس كانت بتستفيد من اي كلام يتكتب عنها في اي جريدة او نافذة اسفيرية ودي الحاجة الخلتها تتطور بسرعة الصاروخ وفي زمن قياسي قدرت تحجز لنفسها موقع مميز جداً وسط الصف الاول من الفنانات السودانيات.

حفل ميادة قمر الدين الاخير ب(ليالي البروف) كان استفتاء حقيقي على نجومية ميادة، وخلوني الخص ليكم في نقاط سريعة ملاحظاتي على الحفل دا:

*كان واضح جداً اهتمام ميادة بكل تفاصيل الحفل الصغيرة قبل الكبيرة، والحاجة دي عكسها الترتيب المميز لتفاصيل الحفل بشكل عام.

* ميادة اكتسبت خبرة كبيرة جداً في التعامل مع المسرح الجماهيري، ودا كان واضح جداً في حضورها وحتى طبيعة اغنياتها الرددتها في الحفل.

*الحفل كشف برضو عن حاجة مهمة شديد وهي انو ميادة قدرت (تربى) جمهور خاص بيها وبس…وممكن تلاحظ الحاجة دي في ترديد الجمهور لاغنياتها معاها-برغم صعوبة كلمات بعض الاغنيات- ودا نجاح كبير جداً.

*اكتر حاجة كانت مميزة في ميادة انها عارفة تماماً (اطار النجومية) المفروض تغني فيهو وماتطلع منو لانو هو الاداها (الهوية الفنية)…ودي مشكلة بتواجه فنانين وفنانات كتار جداً…بيحاولوا دائماً يطلعوا من الاطار دا وبيتعرضوا لفشل ذريع.

*فرقة ميادة الموسيقية بتستحق برضو الثناء والاشادة للاداء العالي والاحترافي، اما (الكورس) ف(ديل حكاية براااهم).

*حالياً ميادة مطلوب منها الحفاظ على المستوى دا او التطوير اكتر لمستوى اعلى، لانو اي نزول من المستوى دا ولو درجة واحدة ممكن يعمل مشكلة كبيرة جداً ليها.

كسرة:
بالتوفيق ميادة…ومزيد من النجاح والتميز . 🌹

اضغط هنا للإنضمام لمجموعة ( سوان لايف ) على الواتسب

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى